Aipaturiko ingurune banatuetan hain ezagun bihurtu diren aplikazioak programatzeko, oinarrizko kontzeptuak ikastea da liburuaren helburuetako bat. Baina Java programazio-lengoaia ere aipatzen da izenburuan. Horrek esan nahi du klaseak eta objektuak -hau da, Objektuetan Oinarritutako Programazioaren oinarrizko kontzeptuak- sarean dantzan ipini nahi ditugula. Metafora horren bidez, ingurune banatuetako programak egiteko erabiliko ditugun klaseak eta objektuak sarean zehar ibiliko direla adierazi nahi dugu. Gailuen arteko komunikazioa lortzeko informazioa toki batetik bestera bidaliko da sarearen bidez, eta xede hori lortzeko klaseak eta objektuak erabiliko dira. Horrez gain, kontzeptu horiek ikasteko erabiliko diren adibideetan, askotan euskal dantzak aipatuko dira. Horregatik, kontzeptu tekniko horiek ikasten dituzun bitartean, dantza horiei buruzko azalpen laburrez eta ilustrazio eder zoragarriez gozatzeko aukera izango duzu.